Áformin gera ráð fyrir frumvarpi til nýrra heildarlaga um Ábyrgðasjóð launa. Áformað er að endurskoða núgildandi lög nr. 88/2003, um Ábyrgðasjóð launa, í heild sinni. Tilgangurinn er meðal annars að bregðast við ítrekuðum ábendingum frá stjórn Ábyrgðasjóðs launa og Ríkisendurskoðun.

Markmið með fyrirhuguðu frumvarpi er meðal annars að eyða óvissu og leysa túlkunarvanda í framkvæmd núgildandi laga, einfalda stjórnsýslu, nútímavæða afgreiðslu sjóðsins með stafrænum lausnum og stuðla að hagræðingu í ríkisrekstri.

Meðal þeirra breytinga sem áformað er að leggja til í frumvarpinu er að stytta ábyrgðartímabil lífeyrissjóðskrafna, leggja niður stjórn Ábyrgðasjóðs launa og gera ákvarðanir Ábyrgðasjóðs launa kæranlegar til úrskurðarnefndar velferðarmála í stað ráðuneytisins. Auk þess verður lagt upp með að einfalda löggjöfina og gera hana skýrari, meðal annars með því að setja orðskýringar inn í lögin og færa ákvæði reglugerðar nr. 462/2003, um Ábyrgðasjóð launa, inn í lögin eftir því sem við á í þeim tilgangi að fella reglugerðina brott.