Markmið viðmiðanna er að stuðla að auknu gagnsæi, samræmi og gæðum við framkvæmd ræstingaútboða ríkisins. Þeim er jafnframt ætlað að stuðla að ábyrgum innkaupum þar sem tekið er mið af raunhæfum kostnaðarforsendum og kjarasamningsbundnum réttindum starfsfólks.

Viðmiðin skýra betur hvernig staðið skuli að undirbúningi útboða, framkvæmd þeirra og eftirfylgni á samningstíma. Þeim er ætlað að styðja við heilbrigða samkeppni og skapa skýrari umgjörð um kaup ríkisins á ræstingaþjónustu.

Drögin byggjast á víðtæku samráði við hagsmunaaðila, þar á meðal Eflingu, Starfsgreinasamband Íslands (SGS), fulltrúa verkkaupa og sérfræðinga á sviði opinberra innkaupa. Við undirbúning þeirra hefur jafnframt verið horft til reynslu bæði hérlendis og erlendis og horft til ábendinga starfshóps um æskilegar útboðsaðferðir ræstingaþjónustu.

Viðmiðin eru leiðbeinandi og verða nýtt við ræstingaútboð ríkisins. Óskað er eftir því að athugasemdir við drögin berist eigi síðar en í lok ágúst.