Áformað er að endurskoða lög nr. 152/2009 um stuðning við nýsköpunarfyrirtæki í því skyni að styrkja lagaumgjörð stuðnings við rannsóknar- og þróunarverkefni fyrirtækja og bæta framkvæmd laganna.

Helstu breytingar sem eru til skoðunar lúta meðal annars að skýrari skilgreiningum og skilyrðum stuðnings, breytingum á umsóknar- og málsmeðferð, heimild til staðfestingar verkefna að hluta, reglum um gildistíma staðfestinga, kostnað vegna aðkeyptrar rannsóknar- og þróunarvinnu og öðrum breytingum sem reynsla af framkvæmd laganna hefur gefið tilefni til. Þá er jafnframt litið til þróunar í atvinnulífi, framkvæmdar rannsóknar- og þróunarverkefna og skuldbindinga Íslands samkvæmt EES-samningnum.

Áformaskjal og mat á áhrifum lagasetningar fylgja málinu og eru umsagnaraðilar hvattir til að koma á framfæri sjónarmiðum um þær breytingar sem þar eru kynntar.