Alþingi samþykkti nýlega frumvarp um einföldun regluverks og aukna skilvirkni eftirlits með hollustuháttum og mengunarvörnum (einföldun eftirlits). Með frumvarpinu eru heilbrigðisnefndir lagðar niður, horfið frá hefðbundinni svæðisskiptingu heilbrigðiseftirlits og framkvæmd eftirlitsins í meginatriðum færð til Umhverfis- og orkustofnunar.

Í kjölfar samþykktar laganna þarf að gera ýmsar breytingar á reglugerðum. Hér eru kynnt til samráðs drög að þeim breytingum á reglugerðum sem heyra undir umhverfis-, orku- og loftslagsráðuneytið. Alls er um að ræða breytingar á 57 reglugerðum. Til hægðarauka er einnig sett fram yfirlitsskjal með yfirliti yfir þær breytingar sem í reglugerðunum felast. Flestar þessara breytinga mæla fyrir um flutning verkefnis frá heilbrigðisnefnd til Umhverfis- og orkustofnunar, en einnig færast einhver verkefni til sveitarfélaga. Jafnframt er orðalag og tilvísanir í reglugerðum uppfært til samræmis við hið nýja fyrirkomulag. Gildistími reglugerðarbreytinganna er samhliða gildistíma lagabreytinganna, 1. janúar 2027.