Þingsályktunin er unnin upp úr tillögum starfshóps um offitu, holdafar, heilsu og líðan sem skilaði skýrslu til heilbrigðisráðherra í febrúar 2024, en byggir einnig á vinnu verkefnastjóra og þverfaglegri vinnustofu um málefni offitu á Íslandi sem haldin var á vegum ráðuneytisins í maí 2025.

Framtíðarsýn stjórnvalda í málaflokknum er fjórþætt:

1) Efling forvarna með áherslu á að draga úr nýgengi offitu og koma í veg fyrir þróun alvarlegra offitu, sérstaklega meðal ungra einstaklinga. Þá verði unnið gegn neikvæðum viðhorfum og fordómum.

2) Algengi offitu meðal barna verði ekki lengur hæst á Norðurlöndunum.

3) Offita verði meðhöndluð líkt og aðrir langvinnir sjúkdómar, með uppvinnslu, formlegri greiningu og aðgengi að langtímameðferð og endurhæfingu þar sem byggt er á gagnreyndum aðferðum.

4) Fjölbreytt og fagleg meðferðarúrræði verði aðgengileg þeim sem þurfa á heilbrigðisþjónustu að halda vegna sjúkdómsins.

Aðgerðaáætlunin skiptist í þrjá kafla: 1) Forvarnir og skimun; 2) Gagnaöflun, rannsóknir og skráningar; og 3) Heildræn heilbrigðisþjónusta fyrir börn og fullorðna.