Með Evrópugerðunum er regluverk Evrópusambandsins um varfærniseftirlit með verðbréfafyrirtækjum í megindráttum skilið frá reglum um varfærniseftirlit með bönkum og öðrum lánastofnunum. Með því móti getur regluverkið betur tekið mið af sérstöðu hvorrar tegundar fyrirtækja fyrir sig og unnt er að hafa einfaldari löggjöf fyrir verðbréfafyrirtæki. Lagt er til að gerðirnar verði innleiddar með nýjum lögum um varfærniskröfur til verðbréfafyrirtækja og að gildandi lög um fjármálafyrirtæki, sem eiga nú bæði við um verðbréfafyrirtæki og lánastofnanir, verði að lögum um lánastofnanir. Samhliða verði hugtakið fjármálafyrirtæki lagt af sem yfirheiti fyrir verðbréfafyrirtæki og lánastofnanir.