Með drögunum er lagt til að læknisvottorðs verði ekki krafist sökum aldurs fyrr en umsækjandi hefur náð 75 ára aldri. Það er í kjölfar beiðni heilbrigðisyfirvalda sem hafa, auk annars, bent á að einstaklingar séu almennt heilbrigðari og lifi lengur nú en áður sem og að gildandi kröfur leiða til þess að gefa þarf út mikinn fjölda vottorða ár hvert og því munu breytingarnar draga úr álagi á lækna sem framkvæma læknisskoðanir og veita vottorð. Eftir sem áður gildir meginregla 48. gr. umferðarlaga og ökumönnum ber að tryggja að þeir séu líkamlega og andlega færir um að stjórna ökutæki í hvert sinn – sama á hvaða aldri þeir eru.