Við undirbúning og vinnslu frumvarps til laga um lagareldi hefur atvinnuráðuneytið orðið þess áskynja að mikil þörf sé á endurskoðun á regluverki og framkvæmd á málefnasviði lax- og silungsveiða en margvísleg skörun á sér stað á milli þess og regluverks  á málefnasviði lagareldis. Enn fremur hafa stofnanir ráðuneytisins og hagsmunaaðilar bent á nauðsyn þess að taka upp margvísleg atriði á málefnasviði lax- og silungsveiða en núverandi lagaumgjörð er frá árinu 2006.  

Með frumvarpinu eru lagðar til breytingar sem hafa það að markmiði að styrkja lagaumgjörð um lax- og silungsveiði og fiskrækt í ám og vötnum. Frumvarpið tekur m.a. til breytinga á lögum um lax- og silungsveiði, 61/2006, lögum um fiskrækt, nr. 58/2006, og lögum um Fiskræktarsjóð, nr. 72/2008.

Samning frumvarpsins stendur yfir og samhliða því verður unnið að endanlegu mati á fjárhagsáhrifum lagasetningarinnar og því gerð skil í endanlegu mati á fjárhagslegum áhrifaþáttum fyrir ríkið.

Hér með er óskað eftir umsögnum, athugasemdum og ábendingum um áform um lagasetningu og frummat.