Í frumvarpsdrögunum er í fyrsta lagi lagt er til að við mat á því hvort fjárhagsvandi sé til staðar, þá skuli jafnframt horfa jafnt til fjárhagsstöðu nýsköpunarfyrirtækis og móðurfélags þess, ef það er til staðar. Er þessi breyting í samræmi við túlkun Evrópudómstólsins í málum er varða ríkisaðstoð og byggja á regluverki sem innleitt hefur verið hér á landi með EES samningnum og viðaukum með honum. Í öðru lagi er lagt til að í lögunum komi fram hámarkshlutfall þess kostnaðar sem fyrirtæki getur talið fram sem styrkhæfan kostnað og felst í aðkeyptri vinnu fyrirtækisins. Er lagt til að hlutfallið sé 80% af heildar styrkhæfum kostnaði ársins hjá viðkomandi fyrirtæki. Í þriðja lagi er lagt til að gildistími staðfestingar á verkefni gildi í tvö ár, í stað eins, í þeim tilvikum þegar nýsköpunarfyrirtæki hefur eingöngu með höndum starfsemi sem snýr að rannsóknum og/eða þróun sem staðfestingin snýr að og árlegur kostnaður er ekki umfram 125 milljónir kr.