Í frumvarpinu eru gerðar tillögur til breytinga á skipulagslögum og lögum um Húsnæðis- og mannvirkjastofnun auk þess sem lagðar eru til breytingar á ákvæðum fleiri laga sem leiða af þeim breytingum. Lagt er til að starfsemi Húsnæðis- og mannvirkjastofnunar og Skipulagsstofnunar verði sameinuð þannig að verkefni Skipulagsstofnunar renni inn í Húsnæðis- og mannvirkjastofnun og að heiti stofnunarinnar verði breytt í Húsnæðis-, mannvirkja- og skipulagsstofnun og að öll stjórnsýsla skipulagsmála og verkefni Skipulagsstofnunar verði á höndum stofnunarinnar.

Með sameiningu starfsemi Húsnæðis- og mannvirkjastofnunar og Skipulagsstofnunar verður allur ferillinn, frá skipulagi til fullbúins mannvirkis, á höndum einnar stofnunnar gagnvart sveitarfélögum, fasteignaeigendum og öðrum hagsmunaaðilum. Jafnframt er markmiðið að auka bolmagn hins opinbera á sviði skipulagsmála með samlegðaráhrifum af rekstri málaflokksins í stærri stofnun og samþættingu við aðra málaflokka á sama sviði. Þá er sameiningunni ætlað að mæta auknum kröfum um betri heildaryfirsýn yfir þróun byggðar, sjálfbæra landnotkun, húsnæðisþörf og nýtingu auðlinda.