Veltumörkum tilkynningarskyldra samruna var síðast breytt árið 2020. Hið sama gildir um samrunagjald. Í skýrslu Ríkisendurskoðunar um stjórnsýsluúttekt á Samkeppniseftirlitinu frá júlí 2022 er m.a. bent á að veltumörkin þurfi að endurskoða reglulegar, sem og að samrunagjald þurfi að endurskoða með það fyrir augum að það mæti betur raunkostnaði við samrunaeftirlit. Þá er í skýrslunni bent á að í samkeppnislög vanti ákvæði sem stöðvi tímafresti vegna atvika sem varða tafsama, villandi eða ranga upplýsingagjöf í samrunamálum, auk þess sem valdheimildir þess til rannsókna, svo sem húsleitar, séu þrengri en almennt gerist annars staðar í Evrópu.