Fjármála- og efnahagsráðuneytið hefur, í samvinnu við Skattinn, haft uppgjörsreglur virðisaukaskatts til athugunar. Reglurnar varða uppgjörstímabil og gjalddaga virðisaukaskatts og uppgjör á virðisaukaskatti vegna innflutnings vöru fyrir skattskylda starfsemi.

Ráðuneytið hefur enn fremur til skoðunar hvort tilefni sé til að breyta gildandi reglum um greiðslufrest aðila, sem skráðir eru á virðisaukaskattsskrá, á öðrum aðflutningsgjöldum til samræmis við breytingar á uppgjöri og skilum á virðisaukaskatti.

Markmið athugunarinnar var m.a. að kanna hvort mögulegt sé að einfalda fyrirkomulag við uppgjör á virðisaukaskatti með margháttaðan ávinning í huga. Má þar nefna að bæta lausafjárstýringu ríkissjóðs og draga þannig úr vaxtakostnaði hans, einfalda framkvæmd skattálagningar, draga úr möguleikum á undanskotum og auka gæði gagna um veltu í hagkerfinu. Athugunin fól m.a. í sér að rýna gildandi regluverk hér á landi og skoða regluverk um sama efni á öðrum Norðurlöndum og í ríkjum Evrópusambandsins, þ.m.t. reglur um uppgjör á virðisaukaskatti í tolli.

Unnin hafa verið drög að breytingatillögum á grundvelli framangreinds. Drögin ásamt nánari upplýsingum er að finna í meðfylgjandi skjali. Horft er til þess að breytingarnar geti tekið gildi 1. janúar 2027.

Aðilar, sem telja sig málið varða, eru hvattir til að senda inn umsögn eða ábendingu.