Í stefnuyfirlýsingu ríkisstjórnar Samfylkingar, Viðreisnar og Flokks fólksins, frá 21. desember 2024, kemur fram að markmiðum sínum muni ríkisstjórnin m.a. ná með mótun atvinnustefnu sem stuðli að sjálfbærum vexti atvinnugreina, aukinni framleiðni og heilbrigðum vinnumarkaði.

Tilgangur vinnu að atvinnustefnu ríkisstjórnarinnar er að móta stefnu, ásamt markmiðum og mælikvörðum, sem lýsir því hvernig stjórnvöld vilja vinna með atvinnulífinu og svarar því hvaðan hagvöxtur næstu ára skuli koma. Skilgreindar verða aðgerðir sem ríkistjórnin telur að ráðast þurfi í til að vinna að markmiðum stefnunnar.

Stefnumótunin verður leidd af forsætisráðuneytinu en verður unnin í víðtæku samráði. Fundað verður með helstu hagaðilum á meðan á stefnumótun stendur og samráðsgátt stjórnvalda verður nýtt til að eiga samráð um áform og drög að stefnu. Forsætisráðuneytið mun jafnframt standa fyrir opnum viðburði í september um áherslur atvinnustefnunnar.

Forsætisráðherra mun skipa óháð atvinnustefnuráð sem mun veita ráðherra, ráðherranefnd um efnahagsmál og ríkisstjórn ráðgjöf um mótun og framkvæmd stefnunnar.

Kallað er eftir endurgjöf um áform ríkisstjórnarinnar. Einnig er óskað eftir svörum við eftirfarandi spurningum:

1. Hver ættu helstu markmið og lykilmælikvarðar að vera varðandi þróun atvinnulífs næstu tíu ár?

2. Til hvaða aðgerða geta stjórnvöld gripið til að efla útflutning, fjölga vel launuðum störfum og auka framleiðni vinnuafls næstu tíu ár?

3. Hvaða útflutningsgreinar, þar sem framleiðni vinnuafls er há og loftslagsáhrif eru takmörkuð, geta vaxið mest á næstu tíu árum og náð árlegum útflutningi sem nemur tugum milljarða króna?

Svörum og endurgjöf má skila í gegnum samráðsgátt eða senda á for@for.is