Þann 5. apríl 2024 skilaði verkefnisstjórn verndar- og orkunýtingaráætlunar tillögu að flokkun virkjunarkosta sem Alþingi hafði óskað eftir endurmati á með afgreiðslu verndar- og orkunýtingaráætlunar í júní 2022. Í tillögu verkefnisstjórnar er meðal annars lagt til að virkjunarkostir í Héraðsvötnum ásamt Kjalölduveitu verði flokkaðir í verndarflokk áætlunarinnar. Tillaga þess efnis var lögð fram á Alþingi á 156. löggjafarþingi en náði ekki fram að ganga.

Í 5. mgr. 10. gr. laga nr. 48/2011, um verndar- og orkunýtingaráætlun, kemur fram að ráðherra taki tillögu verkefnisstjórnar til skoðunar og gangi frá tillögu um verndar- og orkunýtingaráætlun í samræmi við 3. gr. laganna. Ef lagðar eru til breytingar á tillögu verkefnisstjórnar skal leita umsagnar og kynna breytingarnar almenningi áður en tillagan er lögð fram á Alþingi.

Umhverfis-, orku- og loftslagsráðherra hefur ákveðið að setja breytingu á tillögu verkefnisstjórnar í samráðferli, þess efnis að Kjalölduveita og virkjunarkostir í Héraðsvötnum, þ.e. Skatastaðavirkjun C, Skatastaðavirkjun D, Villinganesvirkjun og Blanda, Vestari-Jökulsá verði flokkaður í biðflokk. Ekki er lögð til breyting á tillögum verkefnisstjórnar á flokkun Holtavirkjunar, Urriðafossvirkjunar og Skrokköldu. Gert er ráð fyrir að tillaga til þingsályktunar um breytingu á verndar- og orkunýtingaráætlun verði lögð fram á Alþingi á 157. löggjafarþingi haustið 2025.