Með frumvarpi um breytingu á lögum um áhafnir skipa nr. 82/2022 er ætlunin að bregðast við vanda Slysavarnafélagsins Landsbjargar við mönnun nýrra björgunarskipa.

Áform um lagasetningu voru kynnt í Samráðsgátt stjórnvalda 11. apríl – 2. maí sl. og bárust 6 umsagnir. Þá voru áformin kynnt á fundi fagráðs um siglingar þann 29. apríl sl.

Lagt var mat á allar athugasemdir í umsögnum sem bárust. Námsskrá og listi yfir kennara verður háð samþykki Samgöngustofu. Þá verður námið háð eftirliti stofnunarinnar, líkt og gildir um annað nám í siglingatengdum greinum. Er því ekki talin ástæða til að ætla að gæði náms skv. reglugerð sem sett verður í samræmi við fyrirhugaða breytingu á lögum verði minni en gæði náms í öðrum fagskólum. Í greinargerð með drögum að frumvarpi er hvatt til samráðs við fagskóla við myndun námskrár.