Markmið reglugerðarinnar er að stuðla að þátttöku atvinnuleitenda í vinnumarkaðsúrræðum og bæta möguleika fólks með mismikla starfsgetu til virkni á vinnumarkaði og er gert ráð fyrir að reglugerðin komi í stað annars vegar reglugerðar nr. 918/2020, um þátttöku atvinnuleitenda sem tryggðir eru innan atvinnuleysistryggingakerfisins í vinnumarkaðsaðgerðum og um greiðslu styrkja úr Atvinnuleysistryggingasjóði, og hins vegar reglugerðar nr. 159/1995 um öryrkjavinnu.

Í drögunum er kveðið á um vinnumarkaðsúrræði í tveimur köflum. Annars vegar vinnumarkaðsúrræði fyrir þá sem eru tryggðir samkvæmt lögum um atvinnuleysistryggingar og hins vegar vinnumarkaðsúrræði fyrir atvinnuleitendur með skerta getu til virkni á vinnumarkaði.

Nýtt örorkulífeyriskerfi almannatrygginga tekur gildi þann 1. september nk. og er í nýju kerfi lögð áhersla á að draga úr hindrunum og aðstoða fólk sem vill og getur stundað atvinnu. Helstu nýmæli í reglugerðardrögunum tengjast þeim kerfisbreytingum og er í því sambandi meðal annars gert ráð fyrir að atvinnurekendur sem ráða til starfa atvinnuleitendur sem eiga rétt á svokölluðum hlutaörorkulífeyri í nýju örorkulífeyriskerfi geti á grundvelli samnings við Vinnumálastofnun fengið endurgreiddan hluta af launagreiðslum til viðkomandi starfsmanns.