Skylda fyrirtækja og stofnana til innleiðingar jafnlaunavottunar sem byggist á jafnlaunastaðlinum ÍST 85/2012 var lögfest árið 2017 með lögum um breytingu á lögum um jafna stöðu og jafnan rétt kvenna og karla, nr. 10/2008, með síðari breytingum (jafnlaunavottun). Með breytingu á jafnréttislögunum árið 2020 var minnstu fyrirtækjum á almenna markaðnum (með 25-49 starfsmönnum) gefinn kostur á að velja á milli þess að fá jafnlaunavottun eða jafnlaunastaðfestingu, sem framkvæmd er af Jafnréttisstofu sem er einfaldari og kostnaðarminni í framkvæmd.

Nú þegar nokkur ár eru liðin frá því að framangreind lög tóku gildi er ástæða til að endurskoða lög og reglur um jafnlaunakerfi fyrirtækja og stofnana með tilliti til reynslu af kerfinu og ábendinga sem fram hafa komið um framkvæmd þess. Einnig verður horft til tillagna starfshóps forsætisráðherra um hagræðingu í ríkisrekstri sem skilað var til ríkisstjórnar 4. mars sl. um að létt verði á jafnlaunavottun og stærðarmörk hækkuð. Tilskipun Evrópusambandsins 2023/970 um launagagnsæi verður auk þess höfð til hliðsjónar.

Markmiðið er að einfalda gildandi jafnlaunakerfi fyrirtækja og stofnana í ljósi fenginnar reynslu. Gera ferlið skilvirkara, hagkvæmara og draga úr kostnaði við framkvæmd þess fyrir fyrirtæki og stofnanir að teknu tilliti til markmiða jafnréttislaga um launajafnrétti milli kvenna og karla.