Stýrihópur Stjórnarráðsins um mannréttindi hefur unnið drög að miðannarskýrslu Íslands vegna allsherjarúttektar Sameinuðu þjóðanna á stöðu mannréttindamála (Universal Periodic Review eða UPR). Þriðja allsherjarúttektin fór fram í janúar 2022. Ísland samþykkti 218 af 230 tilmælum, auk þess sem tvö tilmæli voru samþykkt að hluta. Í miðannarskýrslunni má finna yfirlit yfir öll tilmælin sem íslenska ríkið samþykkti í úttektinni og upplýsingar um þær ráðstafanir sem gripið hefur verið til til að bregðast við þeim. Einnig má finna upplýsingar um þau tilmæli sem ekki voru samþykkt.

Allsherjarúttekt Sameinuðu þjóðanna felur í sér heildarúttekt á stöðu mannréttindamála innan aðildarríkja Sameinuðu þjóðanna, en hún fer fram á u.þ.b. fimm ára fresti. Ferlið byggir á jafningjarýni ríkja þ.e. ríkin fara yfir stöðu mannréttindamála hjá hverju öðru og setja fram tilmæli um það sem mætti betur fara. Markmiðið með þessu ferli er meðal annars að bæta stöðu mannréttindamála í heiminum og hvetja ríki til þess að uppfylla skuldbindingar sínar á sviði mannréttindamála. Fyrsta úttektin á stöðu mála hér á landi fór fram árin 2011 til 2012, önnur árin 2016 til 2017 og þriðja árin 2021 til 2022. Fjórða úttektin mun fara fram árin 2026 til 2027.

Ríki ráða því sjálf hvort þau skili inn miðannarskýrslum, en tilgangur þeirra er að gefa stutt og hnitmiðað yfirlit yfir það hvort og þá hvernig brugðist hefur verið við þeim tilmælum sem samþykkt voru í síðustu úttekt. Óskað er eftir umsögnum og ábendingum um efni skýrslunnar. Einnig má benda á að félagasamtök og mannréttindastofnanir geta sent sínar eigin miðannarskýrslur, sjá nánari upplýsingar hér: https://www.ohchr.org/en/hr-bodies/upr/ngos-nhris.