Reglugerð (EB) 765/2008, um kröfur varðandi faggildingu og markaðseftirlit í tengslum við markaðssetningu á vörum, kveður m.a. á um að faggildingarstofnanir aðildarríkja þurfi reglulega að undirgangast jafningjamat til að tryggja samræmi í faggildingarstarfsemi á innri markaðnum. Faggildingarsvið Hugverkastofunnar undirgekkst nýverið jafningjamat evrópsku faggildingarsamtakanna, þar sem leiddir voru í ljós nokkrir ágallar á gildandi löggjöf, sem nauðsynlegt er að lagfæra. Á meðal þess sem til stendur að uppfæra í lögum um faggildingu o.fl. er eftirtalið:

• Bætt verði við ákvæði um markmið laganna.

• Skilgreiningar hugtaka í lögunum verði færðar til samræmis við skilgreiningar í reglugerð (EB) 765/2008. Bætt verði við skilgreiningum á nýjum samræmismatsaðferðum sem fyrirsjáanlegt er að muni þarfnast faggildingar á komandi árum.

• Kveðið verði skýrt á um að faggildingarsvið Hugverkastofunnar sé eina faggildingarstofnunin á Íslandi og sé faglega og fjárhagslega sjálfstæð eining.

• Gerð verði skýrari grein fyrir fjármögnun faggildingarstarfseminnar.

• Kveðið verði á um heimild faggildingarsviðs til að setja á stofn nefndir og fela þeim tiltekin verkefni í umboði sviðsins, eins og nauðsynlegt kann að reynast.

• Skýrð verði stjórnsýsluleg staða ákvarðana faggildingarsviðsins um faggildingu.

• Kveðið verði skýrt á um skyldu faggildingarsviðs til að starfa í fullu samræmi við kröfur reglugerðar (EB) 765/2008, viðeigandi samhæfða staðla og reglur EA.

• Gjaldskrárákvæði laganna verði uppfært.

• Kveðið verði á um að tilkynntir aðilar skuli uppfylla kröfur faggildingar, í samræmi við kröfur ákvörðunar (EB) 768/2008, sem gerir ráð fyrir að slíkt sé staðfest með faggildingarvottorði eða sannað á annan hátt af viðkomandi stjórnvaldi.