Í frumvarpsdrögunum eru lagðar til breytingar til að freista þess að sníða af vankanta núverandi laga, án þess þó að stefna í hættu grundvallargildum laganna. Annars vegar með smávægilegum breytingum á lágmarkstíma auglýsingar útboðsins og hins vegar með nýrri tilboðsbók C. Með breytingunum er stefnt að því að auka líkurnar á aðkomu stórra erlendra fagfjárfesta og þannig auka eftirspurn og vægi markmiðs laganna um hagkvæmni, án þess þó að víkja frá yfirlýstum markmiðum og tilgangi núgildandi laga um hlutlægni og jafnræði. Það er einkum gert með viðbót um sérstaka tilboðsbók C, sem er eingöngu ætluð fyrir afmarkaðan hóp fagfjárfesta.

Hnykkt er á því í athugasemdum við frumvarpsdrögin með hvaða hætti hugsanlegt er að ráðherra muni auka magn útboðsins, gefi eftirspurn tilefni til þess.