Ráðuneytið hefur birt fylgiskjal sem sýnir rekjanlegar breytingar á lyfjalögum nr. 100/2020 sem frumvarpsdrögin leggja til. Birt með fyrirvara um villur.

1. gr. frumvarpsdraganna, sbr. breytingar á 3. gr. laganna, inniheldur röng númer töluliða og verðar gerðar viðeigandi leiðréttingar á greininni.

Helstu breytingar sem frumvarpsdrögin innihalda eru eftirfarandi:

• Heimildir Lyfjastofnunar til að bregðast við lyfjaskorti.

• Skýrar skyldur á heildsöluleyfishafa um að tilkynna um lyfjaskort innan tveggja mánaða nema skortur sé ófyrirséður.

• Sérstök skylda á heildsöluleyfishafa um að tryggja jafna dreifingu lyfja.

• Reglugerðarstoð fyrir lyfjafræðilega þjónustu.

• Breytingar á ákvæðum er varða lyf án markaðsleyfis, sbr. undanþágulyf.

• Heimildir lyfjafræðinga til að ávísa bóluefnum vegna bólusetninga í lyfjabúðum.

• Breyting á heiti lyfjanefndar Landspítala yfir í hlutlausara heiti með vísan til hlutverks nefndarinnar á landsvísu og ráðherra veittar heimildir til að kveða á um starfsemi annarra lyfjanefnda heilbrigðisstofnana. Í frumvarpsdrögunum er lagt til að heiti lyfjanefndar Landspítala verði hlutlaust og endurspegli hlutverk nefndarinnar á landsvísu. Ráðuneytið hafði áður lagt upp með að breyta heitinu í „lyfjaráð“ en það er þegar í notkun hjá Íþrótta- og Ólympíusambandi Íslands og hætta á ruglingi. Í drögunum er því notast við „fagráð lyfja“ en ráðuneytið óskar eftir tillögum að betra heiti.

• Breytingar á ákvæðum um greiðsluþátttöku lyfja, m.a. eru vinnureglur sjúkratryggingastofnunarinnar gerðar hluti af ákvörðun um greiðsluþátttöku í lyfjum.

Sjá nánari útlistun á meginefni frumvarpsdraganna í 3. kafla greinargerðarinnar.