Við undirbúning á framlagningu frumvarps til laga um breytingu á lögum um svæðisbundna flutningsjöfnun fyrir 154. löggjafarþing þar sem lagðar voru til breytingar á 6. gr. laganna, voru gerðar athugasemdir við að í 3. mgr. 6. gr. laganna væri að finna tilvísun til 200.000 evra. Bent var á að íslenskar krónur væru lögeyrir hérlendis og það ætti að endurspeglast í íslenskri löggjöf nema veigamikil rök mæltu gegn því. Með frumvarpi þessu er m.a. ætlunin að bæta úr þessu.

Við vinnslu frumvarpsins kom svo í ljós að ekki er lengur miðað við gengi sem ESA gefur út og birt er í EES-viðbæti við Stjórnartíðindi Evrópusambandsins og á vef stofnunarinnar við umreikning yfir í íslenskar krónur eins og getið er í 2. málslið 3. mgr. 6. gr. laganna. Við nánari eftirgrennslan hefur verið frá 1. janúar 2020 stuðst við annað verklag skv. fyrirmælum frá Evrópu og hefur því verklagi verið fylgt við útreikninga frá 1. janúar 2020. Lagt er til að lagatextanum verði breytt.

Þá liggur fyrir að löggjöfin muni renna sitt skeið á enda þann 31. desember 2025. Fyrir liggur vilji til að viðhalda þeirri styrkvæðingu sem lögin kveða á um enda er gert ráð fyrir fjármögnun laganna í fjármálaáætlun til næstu fimm ára.