Frumvarp þetta lýtur að breytingum á 2. gr. a laga um ávana- og fíkniefni, nr. 65/1974. Annars vegar að veita heilbrigðisstofnunum og frjálsum félagasamtökum jafnframt heimild til að stofna og reka neyslurými, þ.e. að þessum aðilum verði veitt sama heimild og sveitarfélög hafa nú. Hins vegar að heimila fólki 18 ára og eldra að nota vímuefni í neyslurými óháð neysluaðferð, þ.e. ekki sé því eingöngu heimilt að sprauta efnum í æð, heldur einnig reykja og nota efni um aðrar slímhúðir líkamans. Breytingarnar eru minni háttar en skipta fólk sem notar vímuefni miklu máli.