Skýrsla þessi er afurð vinnu starfshóps sem heilbrigðisráðherra skipaði og fól að skrifa hvítbók um stöðumat lyfjafræðilegrar þjónustu í apótekum í samanburði við hinar Norðurlandaþjóðirnar og gera tillögur að úrbótum. Starfshópnum var ætlað að leggja mat á þjónustu apóteka hér á landi bæði í þéttbýli og dreifbýli, skoða stöðu þessarar þjónustu í nágrannalöndunum, leggja mat á hvernig megi tryggja lyfjafræðilega þjónustu á landsbyggðinni, meta stöðu netapóteka og koma með tillögur fyrir ráðherra um möguleg næstu skref.