Í reglugerðinni er kynnt nýtt fyrirkomulag á greiðsluþátttöku vegna tæknifrjóvgunarmeðferða. Lagt er til að í stað prósentuhlutfalls á greiðsluþátttöku, sem nú gildir, verði greiðsluþátttaka föst fjárhæð fyrir 1.-4. meðferð. Þá er lögð til aukin greiðsluþátttaka. Breytingin myndi fela í sér einföldun og meiri fyrirsjáanleika þar sem greiðsluþátttaka fyrir hverja meðferð yrði sú sama óháð meðferðarstað. Er eftirfarandi greiðsluþátttaka lögð til:

• Greiðsluþátttaka vegna 1. meðferðar (glasa-, smásjár- tæknisæðingar) verði 150.000 kr.

• Greiðsluþátttaka vegna 2.-4. meðferðar verði 400.000 kr. fyrir hverja meðferð.

• Greiðsluþátttaka vegna gjaldliða sem varða einstaklinga í krabbameinsmeðferð verði að hámarki 400.000 kr. samtals.

Greiðsluþátttaka Sjúkratrygginga vegna fyrstu meðferðar yrði þannig rúmlega sexfalt hærri en hún er nú, úr 24 þús. kr. í 150 þús. kr. Þátttaka í kostnaði við meðferðir nr. 2-4 hækkar um 88 þúsund kr., úr 312.000 kr. í 400.000 kr. Þá er greiðsluþátttaka vegna tæknisæðingar tekin sérstaklega fram í reglugerðinni. Að öðru leyti er vísað til meðfylgjandi reglugerðardraga.