Ný kosningalög tóku gildi 1. janúar 2022. Með þeim lögum voru sameinuð í einn lagabálk öll lög um almannakosningar. Eftir að lögin tóku gildi hafa á grundvelli hinna nýju laga farið fram kosningar til sveitarstjórna og forsetakjör. Við framkvæmd þessara kosninga hefur komið í ljós ýmislegt sem betur má fara í löggjöfinni og kveða þarf með skýrari hætti á um. Þá er jafnframt rétt að gera breytingar á lögum um starfsemi stjórnmálasamtaka og færa það verkefni, sem nú er hjá dómsmálaráðuneytinu að úthluta listabókstöfum við alþingiskosningar yfir til landskjörstjórnar en það verkefni á meiri samlegð með störfum landskjörstjórnar en ráðuneytisins.