Áformað er að leggja fram á vorþingi 2025 frumvarp til laga um breytingu á lögum um ávana- og fíkniefni, nr. 65/1974, í því skyni að heimila heilbrigðisstofnunum að opna og reka neyslurými og að í neyslurýmum verði reykrými.

Fyrirhugað er að breyta 2. gr. a laga um ávana- og fíkniefni, nr. 65/1974, sem er um neyslurými, og kveða jafnframt á um að heilbrigðisstofnunum verði einnig heimilt að opna og reka neyslurými, en ekki aðeins sveitarfélögum. Ástæðan er sú að frekari heimildir til reksturs neyslurýmis geti nýst frekar á landsbyggðinni og jafnvel víðar á höfuðborgarsvæðinu, en að svo stöddu er aðeins eitt neyslurými rekið þar, þ.e. í Guðrúnartúni.

Jafnframt er fyrirhugað að breyta sama ákvæði svo notendum neyslurýmis verði jafnframt heimilt að reykja tiltekin efni í neyslurými en ekki aðeins að sprauta þeim í æð, því þekkt er að slíkt leiðir til skaðaminnkunar tengt notkun þeirra efna og kemur jafnvel í veg fyrir ofskömmtun.