Sóknaráætlun Norðurlands vestra er fimm ára áætlun sem ætlað er að vera leiðarljós í uppbyggingu landshlutans á tímabilinu. Góð sóknaráætlun tryggir að þeir fjármunir sem til ráðstöfunar eru nýtist þar sem þekking á staðbundnum aðstæðum er hvað best.

Vinna við sóknaráætlun hófst á vormánuðum þegar gögn um stöðu landshlutans voru rýnd og gerð úttekt á markmiðum og árangri fyrri sóknaráætlunar. Netkönnun var send til kjörinna fulltrúa og viðtöl tekin við ólíka aðila úr samfélaginu. Haldnar voru þrjár opnar vinnustofur í öllum landshlutanum sem og ungmennaþing til að tryggja aðkomu sem fjölbreyttastra hópa að stefnumótunarferlinu og var þátttaka í öllum viðburðunum mjög góð.

Afrakstur þessarar vinnu var notaður til að móta framtíðarsýn fyrir landshlutann og lagður til grundvallar í sóknaráætluninni. Myndaðir voru fjórir lykilmálaflokkar og áherslur skilgreindar innan þeirra. Að auki voru mótuð markmið sem stuðla að því að ná fram framtíðarsýninni og þau tengd Heimsmarkmiðum Sameinuðu þjóðanna.

Sóknaráætlunin er grundvöllur allrar vinnu landshlutasamtakanna næstu fimm árin. Stefnan mun til dæmis stýra ákvörðun um val á áhersluverkefnum og úthlutun styrkja úr Uppbyggingarsjóði Norðurlands vestra.

Eru íbúar, sem og aðrir hagaðilar, hvattir til að kynna sér nýja sóknaráætlun landshlutans í samráðsgáttinni.