Vísinda- og nýsköpunarráð starfar sjálfstætt og fjallar um stöðu vísinda, tækniþróunar og nýsköpunar á Íslandi með tilvísun til alþjóðlegrar þróunar í stefnumótun á sviðinu, auk þess að vera ráðherranefnd um vísindi og nýsköpun og háskóla-, iðnaðar- og nýsköpunarráðherra til ráðgjafar. Meðal hlutverka ráðsins er að gera tillögur um framtíðarsýn og meginmarkmið stefnu stjórnvalda og setja fram rökstuddar tillögur að umbótum með tilvísun í alþjóðlega þróun á sviði vísinda, tækniþróunar og nýsköpunar.

Í meðfylgjandi drögum, sem eru bæði á íslensku og ensku, koma fram tillögur ráðsins að framtíðarsýn stjórnvalda og meginmarkmiðum stefnu stjórnvalda á sviði vísinda, tækniþróunar og nýsköpunar til næstu tíu ára. Tillögurnar fjalla m.a. um hvernig megi styrkja stoðir íslensks nýsköpunar- og rannsóknaumhverfis, efla markvisst bæði hagnýtar rannsóknir og áhugadrifnar grunnrannsóknir og stuðla að framúrskarandi menntakerfi til hagsbóta fyrir núverandi og framtíðar kynslóðir.

Markmið samráðsins er að kalla eftir sjónarmiðum helstu hagaðila og almennings og um leið stuðla að upplýstri umræðu um mikilvægi vísinda, tækni og nýsköpunar fyrir íslenskt samfélag, lausn samfélagslegra áskorana og samkeppnishæfni atvinnulífsins.

Innsendar umsagnir verða hafðar til hliðsjónar við áframhaldandi stefnumótunarvinnu. Að afloknu samráði verða drög að stefnu stjórnvalda á sviði vísinda, tækniþróunar og nýsköpunar, ásamt aðgerðaáætlun, lögð fyrir ríkisstjórn til samþykktar.