Félags- og vinnumarkaðsráðherra hyggst á haustþingi leggja fram tillögu til þingsályktunar um stefnu í málefnum innflytjenda til fimmtán ára ásamt fjögurra ára framkvæmdaáætlun til að fylgja eftir markmiðum hennar.

Í stefnunni kemur í fyrsta sinn fram framtíðarsýn stjórnvalda og meginmarkmið til næstu fimmtán ára. Stefnan er unnin í breiðu samráði við haghafa og almenning með sérstakri áherslu á aðkomu innflytjenda sjálfra. Alls hafa um 550 einstaklingar komið að vinnunni og er hvítbókin niðurstaða þessa breiða samráðs. Stefnunni er ætlað að vera leiðarljós til framtíðar og styrkja grundvöll ákvarðana um þau málefni sem snerta líf og velferð innflytjenda hér á landi. Hún leggur grunn að samábyrgð samfélagsins, jafnt innlendra sem innflytjenda, á mótun inngildandi samfélags.

Framkvæmdaáætlun er unnin að tillögum innflytjendaráðs í samráði við ráðuneyti og stofnanir sem bera ábyrgð á aðgerðum áætlunarinnar. Með aðgerðum framkvæmdaáætlunar er tekist á við brýn verkefni til að tryggja framgang stefnunnar. Áætlunin er fyrsta skref af mörgum til að ná fram langtíma áhrifum og því framtíðar samfélagi sem birtist í stefnunni.

Í auðlesinni útgáfu er aðeins um að ræða framkvæmdaáætlunina með hlekkjum á auðlesna útgáfu stefnunnar sem áður var birt.