Í drögum frumvarpsins eru lagðar til breytingar á lögum um veiðigjald, nr. 145/2018, þ.e. ákvæðum 4., 5. og 8. gr. laganna.

Lagt er til að veiðigjald á uppsjávartegundir verði hækkað úr 33% í 45%. Þá verði álag á uppsjávartegundir fellt brott ásamt heimild laganna til að draga veiðigjald sem rekstrarkostnað frá tekjuskattsstofni. Frumvarpið byggir að hluta til á umfjöllun um veiðigjald í skýrslu starfshópa Auðlindarinnar okkar - Sjálfbær sjávarútvegur og mun að hluta til uppfylla markmið fjármálaáætlunar 2025-2029 um hækkun veiðigjalds.

Verði frumvarpið að lögum er áætlað að hækkun veiðigjalds á uppsjávartegundir muni leiða til um eins milljarðs króna hækkunar á tekjum ríkisins í meðalári, en á móti mun niðurfelling 10% álags á uppsjávarstofa lækka tekjur ríkissjóðs um 200 milljónir króna og heildaraukning á tekjum ríkissjóðs muni því nema um 800 milljónum króna. Nokkur óvissa er um þær heildartekjur sem breytingin muni skila þar sem veiðigjald byggir á aflaverðmæti nytjastofna og ráðgjöf um leyfilegan heildarafla hverrar tegundar fyrir sig, sem liggur ekki fyrir nema í ár í senn og því veruleg óvissa um það hver þróun veiðigjaldsins verður, þegar litið er til lengra tímabils en yfirstandandi fiskveiðiárs. Ákveðin óvissa er einnig um það hverju niðurfelling heimilda til að draga veiðigjald frá tekjuskattsstofni muni nákvæmlega skila í tekjum ríkissjóðs. Það ræðst m.a. af því að ekki er unnt að ganga út frá því að allir sem greiða veiðigjald séu með jákvæðan tekjuskattsstofn, m.a. vegna tapreksturs eða nýtingu eldra taps. Líklegt má þó telja að heildartekjuskattur á lögaðila sem greiða veiðigjald kunni að hækka um 10-20% af því sem nemur greiddu veiðigjaldi ár hvert.

Áform um lagasetningu og mat á áhrifum voru birt í drögum að frumvarpi til laga um sjávarútveg á tímabilinu 24. nóvember 2023 til og með 17. janúar 2024 í máli nr. S-245/2023 og bárust 93 umsagnir um drögin.

Hér með er óskað eftir umsögnum, athugasemdum og ábendingum um drög frumvarpsins og endanlegt mat á áhrifum þess.