Fjallað er um varðveislu viðkvæmra hafsvæða og friðunarsvæði í hafi fyrir veiðum og veiðarfærum í 9. gr. laga nr. 79/1997, um veiðar í fiskveiðilandhelgi Íslands. Frumvarpið miðar að því að styrkja lagagrunn fyrir setningu reglugerða er varðar verndarsvæði í hafi, einkum er varðar samræmi við stefnumótun Íslands og fylgni við alþjóðlega þróun um verndun hafsvæða. Auk þess þarf að skoða hvort rétt sé að hafa heimild í lögum til að takmarka aðrar aðgerðir eða framkvæmdir sem geta haft neikvæð áhrif á nytjastofna á grunni vistkerfisnálgunar. Þá er rétt að uppfæra hugtök og skilgreina betur hvað séu verndarsvæði í hafi. Rétt er að skýra hlutverk Hafrannsóknastofnunar og annarra stofnanna hvað varðar tilnefningu verndarsvæða í hafi.