Með lögum nr. 102/2024 um breytingu á lögum um veiðar í fiskveiðilandhelgi Íslands og lögum um stjórn fiskveiða (veiðistjórn grásleppu) sem taka gildi 1. september nk. er mælt fyrir um hlutdeildarsetningu grásleppu í stað sérveiðileyfa. Við gildistöku laganna verður í lögum um veiðar í fiskveiðilandhelgi Íslands mælt fyrir um að ráðherra sé heimilt með reglugerð að banna og takmarka veiðar tímabundið innan staðbundinna veiðisvæða, að hluta eða að öllu leyti vegna hættu á meðafla spendýra og fugla. Þá er við gildistöku laganna mælt fyrir um, í lögum um stjórn fiskveiða, nr. 116/2006, að ráðherra skuli í reglugerð kveða nánar á um skipulag grásleppuveiða, veiðitíma og meðafla grásleppu við aðrar veiðar.

Um er að ræða drög að reglugerð um hrognkelsaveiðar sem byggja að hluta til á ákvæðum núgildandi ákvæða reglugerðar nr. 223/2024 um hrognkelsaveiðar 2024, að teknu tilliti til þeirra lagabreytinga sem öðlast gildi 1. september nk.

Hér með er óskað eftir umsögnum, athugasemdum og ábendingum um drög reglugerðarinnar, en umsagnarfrestur er til og með 29. ágúst nk.