Í júní 2023 voru samþykkt á Alþingi ný lög um nafnskírteini nr. 55/2023. Með lögunum var lagður grunnur fyrir útgáfu nýrra nafnskírteina sem standast þær kröfur sem gerðar eru til öruggra persónuskilríkja, meðal annars samkvæmt reglugerð Evrópuþingsins og ráðsins (ESB) 2019/1157. Við samningu frumvarps til nýrra laga um nafnskírteini var m.a. horft til ákvæða laga um vegabréf nr. 136/1998. Fyrir liggur hins vegar að vegabréfalögin voru samþykkt á Alþingi árið 1998 og hefur ýmis þróun átt sér stað frá þeim tíma, má sem dæmi nefna auknar kröfur sem gerðar eru í lögum um persónuvernd og vinnslu persónuupplýsinga nr. 90/2018. Þá hefur framkvæmdin leitt í ljós að lagfæra þarf tiltekin ákvæði.

Við samningu frumvarps til nýrra laga um nafnskírteini var tekið mið af því sem betur þykir mega fara í vegabréfalögum, en fyrir liggur að lagfæring á þeim ákvæðum í síðarnefndu lögunum stendur eftir. Mikilvægt er að fullt samræmi sé á milli þeirra laga sem varða útgáfu persónuskilríkja hér á landi, þ.e. vegabréfa og nafnskírteina. Þykir því tímabært að leggja til nokkrar breytingar á vegabréfalögum með það fyrir augum að ná enn betra samræmi.