Áformin sem hér eru kynnt eru endurskoðun laga um samskiptaráðgjafa íþrótta- og æskulýðsstarfs nr. 45/2019. Í núgildandi lögum er ákvæði til bráðabirgða þar sem kveðið er á um að eftir 1. janúar 2024 skulu lögin endurskoðuð og getur ráðherra þá lagt niður starf samskiptaráðgjafa íþrótta- og æskulýðsstarfs að fenginni umsögn hagsmunaaðila.

Núgildandi löggjöf um samskiptaráðgjafa er unnin á grundvelli vinnu starfshóps sem skipaður var árið 2918 í kjölfar yfirlýsinga íþróttakvenna undir myllumerkinu #ég líka (#metoo) ásamt frásögnum þeirra. Frá því að samskiptaráðgjafi tók til starfa í byrjun árs 2020 hefur þörfin fyrir úrræðið sýnt sig. Hlutverk hans er að stuðla að öryggi þeirra sem taka þátt í íþrótta- og æskulýðsstarfi. Starf hans hefur þróast mikið á þeim tíma sem liðinn er frá gildistöku laganna og því brýnt að endurskoða lögin með tilliti til þess.