Með frumvarpinu er ætlunin er að veita því lagastoð að stjórn verði skipuð yfir Sjúkrahússinu á Akureyri sem gegni því hlutverki að tryggja frekari faglegan rekstur spítalans. Stjórninni er ætlað, í samráði við forstjóra, að marka stofnuninni langtímastefnu í samræmi við stefnumörkun ráðherra og hlutverk stofnunarinnar samkvæmt lögum. Henni er einnig ætlað að yfirfara árlega starfsáætlun hennar og ársáætlun og leggja sjálfstætt mat á þær og þau markmið og mælikvarða sem þar eru sett fram og gera ráðherra grein fyrir mati sínu innan tveggja vikna frá því að ársáætlun hefur verið lögð fyrir ráðherra til samþykktar. Þá er stjórninni ætlað að taka afstöðu til ákvarðana sem eru mikils háttar eða óvenjulegar í starfsemi stofnunarinnar, svo sem varðandi skipurit stofnunarinnar.

Árið 2022 var bætt við gildandi lög ákvæði um stjórn Landspítala og hefur breytingin gefið góða raun. Samstarf forstjóra Landspítala og stjórnar hefur gengið vel og reksturinn sömuleiðis en nefna má að árið 2023 var þriðja árið í röð þar sem Landspítali var rekinn innan fjárheimilda.

Þar sem vel hefur tekist til á Landspítala þykir nú rétt að sama skref verði stigið með Sjúkrahúsið á Akureyri sem er ein af stærstu stofnunum ríkisins, bæði hvað varðar starfsmannafjölda og fjárheimildir. Því er lagt til að bætt verði við gildandi lög um heilbrigðisþjónustu sérstöku ákvæði um stjórn Sjúkrahússins á Akureyri sem verði samhljóða ákvæði laganna um stjórn Landspítala.