Áformað er að lagfæra lagatilvísanir og orðalag í lögunum, auk þess að setja í lög ákvæði um réttarbeiðnir sem sendar eru frá Íslandi og færa það hlutverk til ríkissaksóknara í ákveðnum tilfellum. Þá verður lagt til að breyta uppröðun á ákvæðum II. kafla laganna um meðferð framsalsmála til að lagaákvæðin séu í betra samræmi við framvindu framsalsmála. Þá er áformað að setja inn reglugerðarheimild sem kveður á um hvaða alþjóðasamningar eru í gildi um gagnkvæma réttaraðstoð og ríkissaksóknara hefur verið falið að afgreiða beiðnir, á grundvelli þeirra samninga, beint og án aðkomu dómsmálaráðuneytisins. Í núgildandi lögum er þetta talið upp í 2. mgr. 22. gr. laganna en betur færi á því að hafa þetta í reglugerð þar sem þá þyrfti ekki að fara í lagabreytingar í hvert sinn sem íslensk stjórnvöld undirgangast nýja alþjóðasamninga á sviði réttaraðstoðar í sakamálum.