Samkvæmt reglugerð nr. 20/2020, um gagnaöflun og rannsóknir á sviði ferðamála, skal Ferðamálastofa meta þörf fyrir gagnaöflun, greiningar og rannsóknir, móta rannsóknaráætlun, og láta framkvæma rannsóknir samkvæmt rannsóknaráætlun í samræmi við lög og reglur þar að lútandi. Rannsóknaráætlun er áætlun til þriggja ára um þá gagnaöflun, greiningar og rannsóknir sem stjórnvöldum er nauðsynleg til að taka stefnumótandi ákvarðanir um uppbyggingu og þróun ferðaþjónustu með sjálfbærni að leiðarljósi. Rannsóknaráætlun skal mótuð á grunni Jafnvægisáss ferðamála og stefnumótunar stjórnvalda. Samkvæmt reglugerðinni skulu drög að rannsóknaráætlun Ferðamálastofu birt í samráðsgátt stjórnvalda og að loknu samráði gerir stofnunin tillögu að rannsóknaráætlun til ráðherra.

Ráðuneytinu hafa borist drög að rannsóknaráætlun í ferðaþjónustu, frá Ferðamálastofu, fyrir 2024-2026 og eru þau birt hér í samráðsgátt stjórnvalda til umsagnar. Er hér um fimmtu slíka rannsóknaráætlun að ræða. Áætlunin er unnin með aðkomu ráðgefandi nefndar um gagnaöflun og rannsóknir, sem starfar skv. 6. gr. reglugerðar nr. 20/2020, og er undir forystu Dr. Ragnars Árnassonar, prófessor emeritus.

Í drögum að rannsóknaráætlun 2024-2026 er gerð grein fyrir viðfangsefnum rannsókna á sviði ferðaþjónustu og farið yfir einstök verkefni sem hér segir:

Fjöldi ferðamanna,

Landamærakönnun (lýðfræði, ferðahegðun, upplifun og útgjöld ferðamanna),

Könnun á viðhorfum Íslendinga til ferðafólks og ferðaþjónustu,

Könnun á ferðahegðun Íslendinga,

Könnun á ferðahegðun erlendra gesta á völdum þéttbýlisstöðum,

Dreifing ferðamanna um landið,

Greining á fjárhag og rekstri fyrirtækja í ferðaþjónustu,

Gagnagrunnur ferðaþjónustu,

Þjóðhagslíkan fyrir ferðaþjónustu.

Áreiðanlegar tölfræðilegar upplýsingar, rannsóknir og greining gagna er afar mikilvæg í ferðaþjónstu, líkt og í öðrum lykilatvinnugreinum þjóðarinnar. Áfram verður unnið að því að efla þá þætti og birtist það meðal annars í tillögu til þingsályktunar um ferðamálastefnu og aðgerðaáætlun til ársins 2030, sem lögð var fram á Alþingi í apríl 2024 og er stefnt að afgreiðslu fyrir þinglok vorþings 2024.