Þann 1. nóvember 2023 tóku gildi lög nr. 35/2023 um breytingu á skipulagslögum, nr. 123/2010, sem fólu í sér innleiðingu heimildar til gerðar svonefnds raflínuskipulags, þ.e. til töku sameiginlegrar skipulagsákvörðunar þvert á sveitarfélagamörk vegna framkvæmdar í flutningskerfi raforku. Meðfylgjandi reglugerðardrög fela í sér breytingar á skipulagsreglugerð til samræmis við framangreindar breytingar á skipulagslögum. Er helsta breytingin sú að við skipulagsreglugerð bætist nýr kafli, 7. kafli, sem fjallar um undirbúning og gerð raflínuskipulags og störf raflínunefndar.

Reglugerðardrögin kveða jafnframt á um tilteknar aðrar nauðsynlegar breytingar á skipulagsreglugerð, fyrst og fremst til að samræma ákvæði hennar nýjum lögum um umhverfismat framkvæmda og áætlana, nr. 111/2021, sem komu í stað laga um mat á umhverfisáhrifum, nr. 106/2000, og laga um umhverfismat áætlana, nr. 105/2006.