Með lögum nr. 110/2023 sem breyttu núgildandi lögum um tóbaksvarnir, nr. 6/2002, var tilskipun Evrópuþingsins og ráðsins 2014/40/ESB, frá 3. apríl 2014, um samræmingu ákvæða í lögum og stjórnvaldsfyrirmælum aðildaríkjanna varðandi framleiðslu, kynningu og sölu á tóbaki og tengdum vörum og um niðurfellingu á tilskipun 2001/37/EB, innleidd í íslenskan rétt.

Með tilskipuninni hafa verið settar afleiddar gerðir um mynd- og textaviðvaranir og útlit umbúða tóbaksvara, innihaldsefni og losun frá tóbaksvörum og upplýsinga- og skýrslugjöf framleiðenda og innflytjenda tóbaksvara.

Í heildina er um að ræða 12 afleiddar gerðir sem varða tóbaksvörur. Lagt er til að innleiða 9 af þeim 12 gerðum með setningu nýrrar reglugerðar og fella þá um leið úr gildi núgildandi reglugerð um mynd- og textaviðvaranir á tóbaki og mælingar á hámarki skaðlegra tóbaksefna, nr. 790/2011. Lagastoð fyrir innleiðingunni er að finna í 6. gr., 6. gr. a., 6. gr. c., 6. gr. f. og 6. gr. g. laga um tóbaksvarnir, nr. 6/2002.

Í meðfylgjandi reglugerðardrögum eru því eftirfarandi afleiddar gerðir innleiddar:

1. Framkvæmdaákvörðun framkvæmdastjórnarinnar (ESB) 2015/2186 frá 25. nóvember 2015 um snið til að leggja fram upplýsingar um tóbaksvörur og gera þær aðgengilegar.

2. Framkvæmdaákvörðun framkvæmdastjórnarinnar (ESB) 2016/786 frá 18. maí um málsmeðferð varðandi stofnun og rekstur óháðrar ráðgjafarnefndar til að aðstoða aðildarríkin og framkvæmdastjórnina við að ákvarða hvort tóbaksvörur hafi einkennandi bragð,

3. Framkvæmdareglugerð framkvæmdastjórnarinnar (ESB) 2016/779 frá 18. maí 2016 um samræmdar reglur að því er varðar málsmeðferð til að ákvarða hvort tóbaksvara hafi einkennandi bragð,

4. Framkvæmdaákvörðun framkvæmdastjórnarinnar (ESB) 2016/787 frá 18. maí 2016 um forgangsskrá yfir aukaefni í vindlingum og vafningstóbaki sem falla undir auknar kvaðir um skýrslugjöf,

5. Framseld tilskipun framkvæmdastjórnarinnar (ESB) 2014/109 frá 10. október 2014 um breytingu á II. viðauka við tilskipun Evrópuþingsins og ráðsins (ESB) 2014/40 með því að taka saman safn af myndaviðvörunum til að nota á tóbaksvörur,

6. Framkvæmdaákvörðun framkvæmdastjórnarinnar (ESB) 2015/1735 frá 24. september 2015 um nákvæma staðsetningu almennu viðvörunarinnar og upplýsingatextans á vafningstóbaki sem er sett á markað í pungum,

7. Framkvæmdaákvörðun framkvæmdastjórnarinnar (ESB) 2015/1842 frá 9. október 2015 um tækniforskriftir að því er varðar útlit, hönnun og lögun mynd- og textaviðvörunarmerkinga á tóbaksvörum til reykinga,

8. Framseld tilskipun framkvæmdastjórnarinnar (ESB) 2022/2100 frá 29. júní 2022 um breytingu á tilskipun Evrópuþingsins og ráðsins 2014/40/ESB að því er varðar að afturkalla tilteknar undanþágur sem varða tóbaksvörur sem eru hitaðar,

9. Framkvæmdaákvörðun framkvæmdastjórnarinnar (ESB) 2018/576 frá 15. desember 2017 um tæknistaðla fyrir öryggisþætti sem beitt er varðandi tóbaksvörur.