Núgildandi reglugerð um öflun sjávargróðurs, nr. 90/2018 var sett með stoð í III. kafla A. Sjávargróður í lögum um stjórn fiskveiða, nr. 116/2006. Með lögum nr. 65/2022 um breytingu á lögum um stjórn fiskveiða og lögum um veiðigjald (öflun sjávargróðurs í atvinnuskyni) var ákvæðum III. kafla breytt, en gildandi ákvæði sem voru frá árinu 2017, voru tímabundin og áttu að falla úr gildi við lok ársins 2022. Með lögum nr. 65/2022 voru einnig veittar auknar reglugerðarheimildir sem endurspeglast í drögum reglugerðarinnar.

Í 15. gr. b. laga um stjórn fiskveiða er fjallað um nýtingu sjávargróðurs í atvinnuskyni. Þar er mælt fyrir um að Fiskistofa gefi út leyfi til nýtingar sjávargróðurs til allt að fimm ára í senn. Leyfi til nýtingar á þangi skal bundið við slátturtæki eða slátturpramma sem hagnýtt verða af leyfishafa. Þá er mælt fyrir um að heimild til nýtingar í fjöru eða netlögum sjávarjarða fari samkvæmt samkomulagi við viðkomandi landeiganda eða ábúanda. Grundvöllur leyfis til öflunar sjávargróðurs í atvinnuskyni er nýtingaráætlun sem leyfishafi skal vinna og skal byggja á bestu fáanlegum upplýsingum um útbreiðslu sjávargróðurs og möguleika til hagnýtingar að teknu tilliti til umhverfisaðstæðna. Þá er gert ráð fyrir að heimilt sé að setja viðmið um efni nýtingaráætlunar í reglugerð. Þá skal nýtingaráætlun kynnt Hafrannsóknastofnun sem í samráði við Náttúrufræðistofnun Íslands veitir umsögn um nýtingaráætlunina. Þá er leyfishafa skylt í nýtingaráætlun að greina athugasemdir stofnunarinnar og hvernig brugðist hafi verið við þeim.

Í 4. mgr. 15. gr. b. er sérstaklega fjallað um þau tilvik þegar þörf er á að koma í veg fyrir staðbundna ofnýtingu á tilteknum stofni, þá er ráðherra heimilt að ákveða að öflun sjávargróðurs í atvinnuskyni utan fjörusvæða sé auk almenns veiðileyfis háð sérstöku leyfi Fiskistofu, sbr. 2. mgr. 7. gr. laga um veiðar í fiskveiðilandhelgi Íslands, nr. 79/1997. Í þeim tilvikum er því gerð krafa um bæði almennt veiðileyfi skv. lögum um stjórn fiskveiða ásamt nýtingarleyfi til öflunar sjávargróðurs.

Helstu nýmæli í drögum reglugerðarinnar snúa að nánari umfjöllun um veitingu leyfis til öflunar sjávargróðurs í atvinnuskyni, öflun sjávargróðurs utan fjörusvæða, skilyrði fyrir útgáfu leyfa og breytt orðalag í samræmi við ákvæði 15. gr. b laga um stjórn fiskveiða, nr. 116/2006.

Hér með er óskað eftir umsögnum, athugasemdum og ábendingum um drög reglugerðarinnar.