Samkvæmt 26. gr. laga nr. 150/2020 um jafna stöðu og jafnan rétt kynjanna skal ráðherra leggja fyrir Alþingi á fjögurra ára fresti tillögu til þingsályktunar um framkvæmdaáætlun í kynjajafnréttismálum til fjögurra ára í senn. Um er að ræða drög að þingsályktunartillögu um áttundu framkvæmdaáætlun stjórnvalda í kynjajafnréttismálum.

Til samræmis við jafnréttislög hefur áætlunin verið unnin að fengnum tillögum allra ráðuneyta og að viðhöfðu samráði við Jafnréttisstofu, auk þess sem hliðsjón var höfð af umræðum á jafnréttisþingi 2022. Jafnframt var tekið mið af niðurstöðum umræðuhópa frá fundum samráðsvettvangs um jafnréttismál.

Tillögu forsætisráðherra til þingsályktunar um framkvæmdaáætlun í kynjajafnréttismálum til næstu fjögurra ára er ætlað að ná utan um nokkur af brýnustu verkefnunum í málaflokknum. Ekki er um að ræða tæmandi upptalningu á þeim verkefnum sem brýn eru talin. Tillagan felur í sér áætlun sem skiptist í sex kafla og 44 verkefni sem áætlað er að framkvæma á gildistíma hennar. Er þessu fyrirkomulagi ætlað að tryggja að áherslur og forgangsröðun stjórnvalda á sviði kynjajafnréttismála birtist með skýrum hætti.

Efnisflokkun framkvæmdaáætlunar í jafnréttismálum 2024-2027:

1. Kyn, áhrif og þátttaka

2. Kynjuð tölfræði og mælaborð

3. Jafnrétti á vinnumarkaði og kynbundinn launamunur

4. Kynbundið og kynferðislegt ofbeldi

5. Jafnrétti í menntun og íþrótta- og æskulýðsstarfi

6. Alþjóðastarf

Sérstakt mælaborð sem birt verður á vefsvæði forsætisráðuneytisins mun sýna fram á framgang einstakra verkefna. Samskonar mælaborð er á vefnum fyrir framkvæmdaáætlun í jafnréttismálum 2020-2023.