Í nóvember 2023 birti Ríkisendurskoðun skýrslu til Alþingis vegna stjórnsýsluúttektar stofnunarinnar á eftirliti Matvælastofnunar með velferð búfjár. Í skýrslunni er ítarleg umfjöllun um umfang og framkvæmd eftirlits og var tilgangur úttektarinnar að kanna hvort eftirlitið væri skilvirkt og árangursríkt og hvort það væri í samræmi við lög og reglugerðir um velferð dýra. Í skýrslunni koma fram ábendingar ríkisendurskoðanda í 13. liðum er snúa annars vegar að Matvælastofnun og hins vegar matvælaráðuneytinu.

Það frumvarp sem hér er lagt fram er viðbragð ráðuneytisins við ábendingum sem komu fram í framangreindri skýrslu. Þá eru lagðar til breytingar samkvæmt tillögum Matvælastofnunar með það að markmiði að stuðla að bættu eftirliti stofnunarinnar.