Í yfirlýsingu stjórnvalda frá 12. desember 2022 vegna kjarasamninga á almennum vinnumarkaði í desember s.á. kom fram að stjórnvöld myndu vinna á samningstímabilinu með aðilum að því að kanna grundvöll umbóta á ýmsum sviðum. Einn slíkra þátta voru heimildir lífeyrissjóðanna til fjárfestingar í íbúðarhúsnæði. Í yfirlýsingu stjórnvalda kom fram að skoðaðar yrðu leiðir til að auðvelda lífeyrissjóðum að koma að uppbyggingu á íbúðarhúsnæði til útleigu með því að rýmka heimildir sjóðanna til fjárfestinga í leigufélögum.

Í frumvarpinu verður lögð fram tillaga um breytingar á fjárfestingarheimildum lífeyrissjóða. Tillögunni er ætlað að heimila lífeyrissjóðum að fjárfesta hluta eignarsafns síns í hlutabréfum félaga, sem ekki eru skráð á skipulegan markað, og í hlutum eða hlutdeildarskírteinum sjóða um sameiginlega fjárfestingu, sem ekki eru skráð á skipulegan markað, þar sem meginstarfsemin er að fjárfesta í íbúðarhúsnæði sem ætlað er til langtímaleigu til einstaklinga.