Óskað er eftir umsögnum um drög að frumvarpi til nýrra sérlaga og um breytingar á ýmsum lögum. Innleidd verði hér á landi með tilvísunaraðferð reglugerð (ESB) 2022/858 frá 30. maí 2022 um tilraunaregluverk fyrir innviði markaða sem byggjast á dreifðri færsluskrártækni og um breytingar á reglugerðum (ESB) nr. 600/2014 og (ESB) nr. 909/2014 og á tilskipun 2014/65/ESB (hér eftir DFT-reglugerðin eða DFTR).

DFTR gildir um fjármálaþjónustu, nánar tiltekið viðskipti með fjármálagerninga á grundvelli dreifðrar færsluskrártækni (DFT, e. distributed ledger technology eða DLT) og uppgjör slíkra viðskipta. Með henni er komið á sameiginlegu tilraunaskipulagi vegna innviða sem byggjast á umræddri tækni, svonefndra DFT-markaðsinnviða (þ.e. DFT-markaðstorg fjármálagerninga, DFT-uppgjörskerfi og DFT-viðskipta- og uppgjörskerfi).

DFT hefur verið talin geta hentað fyrir allt sem þarfnast talningar, skráningar og bókunar, jafnvel í því skyni að einfalda eða sameina viðskipti (e. trading) og eftirviðskipti (e. post-trading), sem til þessa hafa verið aðskildar tegundir fjármálaþjónustu. Því er gjarnan haldið á lofti að DFT þyki örugg og notkun hennar stuðli að gagnsæi.

Gert er ráð fyrir að aðilar, hvort heldur þeir sem fyrir eru á markaði (verðbréfafyrirtæki, rekstraraðilar markaða og verðbréfamiðstöðvar) eða nýir, þurfi sértækt leyfi yfirvalda til að reka DFT-markaðsinnviði. Með DFTR eru kröfur þegar gildandi tilskipunar og reglugerða til markaða fyrir fjármálagerninga og um uppgjör viðskipta með fjármálagerninga (MiFID II, MiFIR og CSDR) aðlagaðar sérstöku eðli áskorana/tækifæra tengdum framþróun tækni og nýtingarmöguleikum. Markmið DFTR eru þó ekki síður að vernda fjárfesta, fjármálastöðugleika og heilleika markaðarins.

Frumvarpið mun fela í sér nýmæli og veita innlendum aðilum sömu tækifæri og öðrum á Evrópska efnahagssvæðinu, til nýbreytni og framþróunar á sviði viðskipta með DFT-fjármálagerninga og uppgjörs slíkra viðskipta. Umsagnarfrestur er tvær vikur.