Með frumvarpinu eru lagðar til breytingar á lögum um fyrirtækjaskrá og fleiri lagabálkum vegna ákvæða í tilskipunum ESB og framkvæmdarreglugerðum framkvæmdastjórnar ESB um samteningu aðal-, fyrirtækja- og félagaskráa aðildarríkjanna skv. 22. gr. tilskipunar (ESB) 2017/1132. Í ákvæðum tilskipunarinnar og framkvæmdareglugerða framkvæmdastjórnarinnar settra á grundvelli hennar er kveðið á um að nánar tilgreindar upplýsingar um hlutafélög, einkahlutafélög og útbú erlendra hlutafélaga og einkahlutafélaga skuli vera aðgengilegar í gegnum samteningarkerfið. Einnig er í tilskipun (ESB) 2015/849 og framkvæmdarreglugerð sem sett er á grundvelli 31. gr. a tilskipunarinnar kveðið á um aðgang lögbærra yfirvalda og tilkynningaskyldra aðila eins og þeir eru skilgreindir í tilskipuninni að upplýsingum um raunverulega eigendur lögaðila í gegnum samteningarkerfið.

Frumvarpið var áður birt í samráðsgátt stjórnvalda sl. vor en engar umsagnir bárust. Frumvarpinu hefur verið breytt nokkuð til einföldunar frá því það var kynnt í samráðsgáttinni sl. vor og þykir því rétt að gefa aftur stuttan frest til umsagna.