Dómsmálaráðherra hefur skipað þriggja manna sifjalaganefnd til þess að vinna að endurskoðun á hjúskaparlögum og barnalögum og hefur nefndin þegar tekið til starfa. Umfangsmikil verkefni eru fram undan í tengslum við endurskoðun umræddra laga.

Nefndin skal skila ráðherra drögum að lagafrumvörpum fyrir 1. september 2024, annars vegar drögum að frumvarpi til breytinga á hjúskaparlögum og eftir atvikum breytingum á öðrum lögum, og hins vegar drögum að frumvarpi til breytinga á barnalögum og eftir atvikum breytingum á öðrum lögum.

Allir sem vilja koma ábendingum eða athugasemdum á framfæri sem gætu gagnast í endurskoðuninni eru hvattir til þess að senda umsögn. Unnt er að koma á framfæri almennum ábendingum um hjúskaparlögin en einnig um sérstök atriði laganna sem talin eru þurfa á endurskoðun að halda.