Frumvarpið felur í sér afmarkaðar breytingar á 15. gr. barnaverndarlaga í því skyni að skýra nánar þær reglur sem gilda um endurgreiðslur ríkissjóðs vegna barnaverndarþjónustu sem er veitt samkvæmt lögunum til barna sem ekki hafa fasta búsetu á Íslandi eða barna sem eru án forsjáraðila sinna og hafa hlotið alþjóðlega vernd eða dvalarleyfi hér á landi. Eftir rýni á túlkun og beitingu endurgreiðslureglna 15. gr. laganna hefur komið í ljós að þær eru komnar nokkuð til ára sinna og þykja ekki endurspegla þróun síðustu ára m.a. vegna fjölgunar í hópi framangreindra hópa barna. Er því lagt til að orðalag sérstöku endurgreiðslureglnanna í 5. og 6. mgr. verði skýrt og samræmt. Þá er lagt til að orðalagi reglugerðarheimildar í 6. mgr. 15. gr. barnaverndarlaga verði breytt til að styðja við samræmingu þeirra sjónarmiða sem gilda um þjónustu og endurgreiðslur ríkissjóðs á grundvelli 5. og 6. mgr. 15. gr. laganna.