Ráðgert er að leggja fram frumvarp sem hefur að geyma almennar reglur um hvernig ljúka megi tilvist tiltekinna ógjaldfærra opinberra aðila með slitum sem um margt svipar til gjaldþrotaskipta. Kveikjan að samningu frumvarpsins er sá fjárhagsvandi sem ÍL-sjóður stendur frammi fyrir. Opinberar stofnanir sem njóta ríkisábyrgðar verða ekki teknar til gjaldþrotaskipta samkvæmt 3. mgr. 5. gr. laga um gjaldþrotaskipti o.fl. nema mælt sé á annan veg í lögum og þarf því sérstaka lagaheimild til að koma fram slitum á ÍL-sjóði og uppgjöri skulda hans. Slík lagaheimild er ekki til staðar sem stendur og er helsti tilgangur frumvarpsins að bæta þar úr.