Frá gildistöku laga um framhaldsskóla hafa stjórnvöld unnið að því að efla starfsnám á framhaldsskólastigi og af því tilefni hafa ýmsar umbætur orðið að veruleika. Þann 1. ágúst 2021 gaf þáverandi mennta- og menningarmálaráðherra út reglugerð um vinnustaðanám, nr. 180/2021. Nú þegar fengist hefur reynsla á framkvæmd reglugerðarinnar er tilefni til að breyta ákvæðum laganna, sem fjalla um vinnustaðanám, einkum til að styrkja og bæta lagagrundvöll reglugerðarinnar ásamt því að efla starfsnám á framhaldsskólastigi.

Að auki er tilefni til að skýra og eftir atvikum styrkja lagastoð reglna um innritun í framhaldsskóla, meðal annars í því skyni að draga fram það hlutverk framhaldsskóla að nemendahópar séu fjölbreyttir.

Þá er ástæða til að aðlaga ákvæði laga um framhaldsskóla betur að þeim veruleika þegar ofbeldismál koma upp í framhaldsskólum. Er því áformað að endurskoða ákvæði laganna er snúa að rétti nemenda, ábyrgð þeirra og skólabrag, með það að markmiði að efla forvarnir og viðbrögð við ofbeldi á meðal nemenda í framhaldsskólum.

Að lokum er áformað að endurskoða ákvæði laganna sem fjalla um samninga við framhaldsskóla þar sem lögð verður áhersla á að skýra stöðu samninga ríkisins við einkaaðila um rekstur framhaldsskóla og námsbrauta á framhaldsskólastigi, einkum með tilliti til þeirra breytinga sem orðið hafa á ytra umhverfi samninga við einkaaðila um rekstur framhaldsskóla.